Цагдан хорих таслан сэргийлэх арга хэмжээ (ТСАХ)-г өөрчлөх, хүчингүй болгох асуудлыг зохицуулж буй ЭБШХ-ийн 70.1, 70.2 дахь заалттай хамааралтайгаар 2008 оны 01 сарын 30-ны өдөр Улсын Дээд шүүхийн Ерөнхий шүүгч, Улсын Ерөнхий прокуророос хамтран 07, 26 тоот захирамж, тушаал гаргаж, “Баривчлах, цагдан хорихтой холбогдсон зарим ажиллагааг зохицуулах тухай журам”-ыг баталсан. Уг журмын 5-ийн 5 дахь заалтаар цагдан хорих ТСАХ-г өөрчлөх, хүчингүй болгох эсэх асуудлыг шүүгч шийдэхдээ зөвхөн прокурорын саналыг үндэслэн шийдвэрлэж, энэ талаар шүүхэд ирсэн саналыг прокурорт буцаахаар зохицуулсан. Харин прокурор нь мөрдөн байцаагч, өмгөөлөгчийн саналыг харгалзана гэж зохицуулсан. Ийнхүү цагдан хорих ТСАХ-г өөрчлөх, хүчингүй болгох асуудалд өмгөөлөгчийн хүсэлтийг үнэлэх эрх болоод уг асуудлаар санал гаргах эрхийг прокурорт олгосноор энэ нь хууль, шүүхийн өмнө тэгш эрх эдлэх зарчмыг алдагдуулж, хүний эрх тэр дундаа өмгөөлүүлэх эрхийг хангах Үндсэн хуулийн баталгааг үгүй болгосон байна.

Энэхүү илтгэлийн зорилго нь хуулиас давсан хамтарсан захирамжийн нөлөөгөөр цагдан хорих таслан сэргийлэх арга хэмжээг өөрчлөх, хүчингүй болгох асуудал ЭБША-нд хэрхэн явагдаж байгааг судалж, шүүх эрх мэдлийн зүгээс хүний эрхийг хэрхэн бодитойгоор хангах учиртайг Үндсэн хуулийн үзэл баримтлалын үүднээс тодорхойлж, өөрийн зүгээс дүгнэлт, санал дэвшүүлэхэд оршино.

цагдан хорих, таслан сэргийлэх арга хэмжээ, өөрчлөх хүчингүй болгох, хүний эрх, өмгөөлүүлэх эрх, үндсэн хуулийн баталгаа, шүүх эрх мэдлийн зарим асуудал, прокурорын яллах чиг үүрэг, прокурорын санал, өмгөөлөгчийн хүсэлт, хууль, шүүхийн өмнө тэгш эрх эдлэх зарчим, сэжигтэн яллагдагчийн эрх, хамтарсан захирамж, хүний эрхийн зөрчил