Сүүлийн жилүүдэд харилцан хөрш залгаа газрын өмчлөгч, эзэмшигчид бие биенийхээ газарт нэвтрэн орж хөршийн эрх зөрчсөн, богино хугацааны ашиглах эрхээр олж авсан газартаа үл хөдлөх эд хөрөнгө барьж үнэ цэнэ бүхий хөрөнгөө эрсдэлд оруулсан, газар буюу түүн дээр баригдсан үл хөдлөх хөрөнгийн эзэмшигч, өмчлөгчдийн хооронд газраа хэрхэн ашиглах, үл хөдлөх эд хөрөнгөө хэрхэн өмчлөх талаар үл ойлголцол бий болсон, орон сууцыг өмчлөгч иргэд, орон сууцны доор байх эзэмшил газартайгаа эрх зүйн ямар харилцаанд байгаа нь тодорхойгүйгээс болон гэр бүлийн буюу хувийн хэрэгцээгээр газар өмчлөгчид бусдад газраа ашиглуулахдаа хэлцлийн хэлбэрээ хэрхэн зөв тодорхойлохоо ойлгоогүйгээс үүссэн маргаанууд цөөнгүй гарах болсон. Энэ бүх маргааны зангилаа Монгол Улсын Үндсэн хуулийн зургаадугаар зүйлийг бүхэлд нь, тэр дундаа энэ зүйлийн 3, 5 дахь хэсгүүдийг Иргэний хууль дахь газрын талаарх үндсэн үзэл баримтлалтай уялдуулан зөв тайлбарлаж чадаагүйтэй холбоотой.

(Монгол Улсын Хөдөлмөрийн баатар, Ардын багш, Гавьяат хуульч, доктор, профессор Б.Чимидийн нэрэмжит шүүх эрх мэдлийн болон хууль сахиулах байгууллагын ажилтан, сургалт, эрдэм шинжилгээний байгууллагын багш, судлаач, оюутны эрдэм шинжилгээний шилдэг илтгэлийн уралдаанд 2018.01.11-ний өдөр Тусгайбайрт шалгарсан илтгэл)

Өмчийн эрх, өмчлөх эрх, газар эзэмших эрх, газар ашиглах эрх, туйлын эрх, эд юмсын хязгаарлагдмал эрх, узурфрукт, бусдын газар дээр барилга байгууламж барих эрх, сервитут, ипотек, in rem, numerus clauses, үүргийн эрх, харьцангуй эрх, in personam, газар