ГУРВАН удаа цаазаар авах ял сонссоны эцэст гэм буруугүй болох нь тогтоогдож, цагаатгагдсан Эрдэнэ-Очирын гэх хэргийг сонсоод багагүй хугацаа өнгөрчээ. Энэхүү дуулиант хэргийг бодоход өөрийн эрхгүй дараах асуултуудыг өөртөө тавимаар санагддаг юм. Хэргийн үйл баримт болгоныг өмгөөлөгч шүүх бүрэлдэхүүнд мэдрүүлэх боломж манайд хэр зэрэг байна?, шүүх бүрэлдэхүүн яллах талын нотлох баримтад хэтэрхий хөтлөгдөж, урьдчилсан байдлаар шийдвэргаргаж, түүнийгээ шүүх хуралдаанаар давтаад байнауу? гэх асуултууд.

Эрүүгийн хэргийн мөрдөн шийдвэрлэх ажиллагааны гол цөм нь шүүх хуралдаан биш хэрэг бүртгэлт, мөрдөн байцаалтын шат болоод байгаа нь сүүлийн үеийн маргааны гол сэдэв болж байна. Учир нь хэрэг бүртгэлт мөрдөн байцаалтын шатанд хэргийг эцэслэн шийдвэрлэхтэй холбоотой бүхий л баримт сэлт бүрддэг. Энэ нь хэрэг бүртгэлт, мөрдөн байцаалтын шатанд бий болсон хавтаст хэрэг нь шүүгчийн нотлох баримтыг үнэлэх, шүүгдэгчийг гэм буруутайд тооцоход сөргөөр нөлөөлж болох бөгөөд үүнийг сэжигтэн этгээд, түүний өмгөөлөгчидийн оролцоотойгоор засах боломжтой юм. Учир нь өмгөөлөгч шүүх хуралдаанд мэтгэлцэх тал болон оролцдог тул шүүгчдэд хэргийн байдлыг үнэн зөв ойлгож, шударга шийдвэр гаргахад чухал нөлөө үзүүлнэ. Өмгөөлөх тал яллах талын эсрэг үндэслэлтэй, ялах магадлалтай эсэргүүцэл гаргах нь тэдний байцаан шийтгэх ажиллагаанд хэрхэн оролцох болон эрх нь ямар хэмжээнд олгогдсон эсэхээс ихээхэн хамааралтай.

Гэм буруутайд үл тооцох зарчим, өмгөөлүүлэх эрх, хавтаст хэрэг шүүгчийн сэтгэл зүйд нөлөөлөх нь, өмгөөлөгчийн эрх