Хүний эрхийн түгээмэл тунхаглалд хүн бүр уг тунхаглалд заасан эрхээ ямарваа ялгаварлан гадуурхалтаас ангид эдлэх ёстойг баталгаажуулсан билээ. Энэ ёсоор Ковид-19 цар тахлын үед ч ахмад настнууд эрхээ бусадтай адил тэгш, ямар нэгэн ялгаваргүй эдлэх ёстой. Хэрэв ахмад настныг насаар нь ялгаварлах, тэднийг үл ойшоох бодлого хэрэгжүүлбэл Ковид-19 цар тахлыг бүх нийтээр давж гарахад улам хүндрэлтэй болох бөгөөд эсрэгээрээ тэдний эрхийг хангахад чиглэсэн үйл ажиллагаа нь цар тахлыг даван туулахад амжилт авчрах гол түлхүүр болох учиртай юм.
Товчхондоо НҮБ-ын Хүний эрхийн түгээмэл тунхаглалд хүн бүр эрх, эрх чөлөөгөө нас, эрүүл мэндийн байдлаас үл хамааран ямарваа ялгаварлан гадуурхалтгүйгээр эдлэх ёстой гэсэн ч бодит байдал дээр адил тэгш хэрэгжиж чадахгүй байна. Ахмад настнууд Ковид-19 вирусээр өвчлөх, амь насаа алдах өндөр эрсдэл бүхий бүлэгт хамаарч байгаагаас шалтгаалан ялгаварлан гадуурхах хандлага, үйл ажиллагаанд өртөх болжээ. Иймд энэхүү өгүүллээр Ковид-19 цар тахлын үед ахмад настнуудыг ялгаварлан гадуурхалт, үл хайрхах явдлын бай болгоход хүргэж болзошгүй зарим нөхцөл байдлын талаар болон эдгээрийг шийдвэрлэхэд улс орнуудын хэрэгжүүлж буй сайн туршлагуудаас хуваалцахыг зорив.

Ахмад настны эрх; ялгаварлан гадуурхалт; Ковид-19; хүний эрх; хүний эрхийн хязгаарлалт